นิคมนกถา
[1]
ชมฺพุทีปตเล รมฺเม, มรมฺมวิสเย สุเต;
ตมฺพทีปรฏฺเฐ ฐิตํ, ปุรํ รตนนามกํฯ
[2]
ชินสาสนปชฺโชตํ , อเนกรตนากรํ;
สาธุชฺชนานมาวาสํ, โสณฺณปาสาทลงฺกตํฯ
[3]
ตสฺมิํ รตนปุรมฺหิ, ราชาเนกรฏฺฐิสฺสโร;
สิรีสุธมฺมราชาติ, มหาอธิปตีติ จฯ
[4]
เอวํนาโม มหาเตโช, รชฺชํ กาเรสิ ธมฺมโต;
การาเปสิ ราชา มณิ-จูฬํ มหนฺตเจติยํฯ
[5]
ตสฺส กาเล พฺรหารญฺเญ, ติริโย นาม ปพฺพโต;
ปุพฺพการญฺญวาสีนํ, นิวาโส ภาวนารโหฯ
[6]
อฏฺฐารสหิ โทเสหิ, มุตฺโต ปญฺจงฺคุปาคโต;
อรญฺญลกฺขณํ ปตฺโต, พทฺธสีมายลงฺกโตฯ
[7]
ตสฺมิํ ปพฺพเต วสนฺโต, มหาเถโร สุปากโฏ;
ติเปฏกาลงฺกาโรติ, ทฺวิกฺขตฺตุํ ลทฺธลญฺฉโนฯ
[8]
เตภาตุกนรินฺทานํ, ครุภูโต สุเปสโล;
กุสโล ปริยตฺติมฺหิ, ปฏิปตฺติมฺหิ การโกฯ
[9]
โสหํ ลชฺชีเปสเลหิ, ภิกฺขูหิ อภิยาจิโต;
สาสนสฺโสปการาย, อกาสิํ สีลวฑฺฒนํฯ
[10]
วินยาลงฺการํ นาม, ลชฺชีนํ อุปการกํ;
สุฏฺฐุ วินยสงฺคห-วณฺณนํ สาธุเสวิตํฯ
[11]
รูปฉิทฺทนาสกณฺเณ , สมฺปตฺเต ชินสาสเน;
ฉิทฺทสุญฺญสุญฺญรูเป, กลิยุคมฺหิ อาคเตฯ
[12]
นิฏฺฐาปิตา อยํ ฏีกา, มยา สาสนการณา;
ทฺวีสุ โสณฺณวิหาเรสุ, ทฺวิกฺขตฺตุํ ลทฺธเกตุนาฯ
[13]
อิมินา ปุญฺญกมฺเมน, อญฺเญน กุสเลน จ;
อิโต จุตาหํ ทุติเย, อตฺตภาวมฺหิ อาคเตฯ
[14]
หิมวนฺตปเทสมฺหิ, ปพฺพเต คนฺธมาทเน;
อาสนฺเน มณิคุหาย, มญฺชูสกทุมสฺส จฯ
[15]
ตสฺมิํ เหสฺสํ ภุมฺมเทโว, อติทีฆายุโก วโร;
ปญฺญาวีริยสมฺปนฺโน, พุทฺธสาสนมามโกฯ
[16]
ยาว ติฏฺฐติ สาสนํ, ตาว เจติยวนฺทนํ;
โพธิปูชํ สงฺฆปูชํ, กเรยฺยํ ตุฏฺฐมานโสฯ
[17]
ภิกฺขูนํ ปฏิปนฺนานํ, เวยฺยาวจฺจํ กเรยฺยหํ;
ปริยตฺตาภิยุตฺตานํ, กงฺขาวิโนทเยยฺยหํฯ
[18]
สาสนํ ปคฺคณฺหนฺตานํ, ราชูนํ สหาโย อสฺสํ;
สาสนํ นิคฺคณฺหนฺตานํ, วาเรตุํ สมตฺโถ อสฺสํฯ
[19]
สาสนนฺตรธาเน ตุ, มญฺชูสํ รุกฺขมุตฺตมํ;
นนฺทมูลญฺจ ปพฺภารํ, นิจฺจํ ปูชํ กเรยฺยหํฯ
[20]
ยทา ตุ ปจฺเจกพุทฺธา, อุปฺปชฺชนฺติ มหายสา;
ตทา เตสํ นิจฺจกปฺปํ, อุปฏฺฐานํ กเรยฺยหํฯ
[21]
เตเนว อตฺตภาเวน, ยาว พุทฺธุปฺปาทา อหํ;
ติฏฺฐนฺโต พุทฺธุปฺปาทมฺหิ, มนุสฺเสสุ ภวามหํฯ
[22]
เมตฺเตยฺยสฺส ภควโต, ปพฺพชิตฺวาน สาสเน;
โตสยิตฺวาน ชินํ ตํ, ลเภ พฺยากรณุตฺตมํฯ
[23]
พฺยากรณํ ลภิตฺวาน, ปูเรตฺวา สพฺพปารมี;
อนาคตมฺหิ อทฺธาเน, พุทฺโธ เหสฺสํ สเทวเกติฯ
วินยาลงฺการฏีกา สมตฺตาฯ